少年成長今日: 1|主題: 15863

收藏本版

回覆發帖

返回列表

跳至頁

查看: 2863 | 回覆: 2

棒打鴛鴦之後 [複製鏈接]

csir3290

子爵府

積分: 11015

1^#

發表於 6 天前 |只看該作者 |倒序瀏覽 |打印

上個禮拜講到細佬嘅同學畀人棒打鴛鴦之後，個同學見咗好耐訓導，到第二日細佬返嚟同我哋講話個同學都仲係好似悶悶不樂咁。原來最後學校扣咗嗰個男同學三分操行分，之於話同佢拍拖嘅女同學當就然冇事啦！連細佬都知道個原因係因為個女同學家長投訴，所以就算拍拖係兩個人嘅事都好，都淨係個男仔畀學校扣咗操行分。

嗰晚本來都冇乜事，食完飯佢兩姊弟就各自返入房做功課，我同老婆就坐喺廳到睇電視。點知突然間細佬喺房衝出嚟同我哋講，話嗰個男同學send咗張相畀佢，令佢好驚，因為張相係個男同學坐咗喺窗邊影落街度嘅相，而且個男同學仲whatsapp啲同學話冇人關心佢。細佬好緊張即刻同我哋講，佢講講下仲講到想喊添，細佬當時唔知點做佢，話啲同學又好似以為個男仔講笑所以冇人理，細佬本來同嗰個男仔傾緊電話點知突然間個男仔就收咗線，之後細佬想打返電話畀就已經冇再聽細佬電話。細佬當時好擔心驚個男仔出事，我哋見到細佬咁，都即刻諗方法睇吓點樣可以幫到手，我老婆嘗試喺家長群組度睇下可唔可以搵到個男仔嘅家長，但係又冇人覆。細佬又冇老師嘅聯絡，幸好最後老婆透過佢嘅朋友網絡搵到呢間學校嘅老師，通知佢哋有咁嘅事。不過細佬都仲係好擔心，咁我同細佬講話不如我去嗰個男同學住嗰度附近睇下有冇事發生啦！因為細佬好驚佢真係會跳落嚟，但細佬淨係知道個男仔住喺邊條邨，所以我就去咗嗰條邨度睇下有冇事發生，本來細佬話要跟住我去，不過我擔心如果萬一真係有事，到時對細佬仲大影響，所以最後我都係自己去。幸好行晒成條邨都唔見有乜嘢事，因為條邨好平靜即係個男仔冇跳到落嚟。番到屋企一開門就見到細佬喺廚房度同工人姨姨傾到眼濕濕，佢一見到我返嚟就即刻行埋嚟攬住我勁喊。我以為有咩事，我仲同佢講話條村邨冇事好平靜，佢個同學應該會冇事。原來佢話個同學終於覆咗佢，佢同學嘅所謂覆咗細佬就係影咗一張佢喺屋企入面嘅相，而且因為細佬喺個群組度叫同學幫手搵呢個男仔，所以個男仔就叫細佬通知啲同學佢冇事，因為嗰段時間好多人搵佢。咁我同細佬講話冇事就好啦！而且我哋仲讚細佬話，好彩佢識得搵家長幫手添！之後我老婆個朋友打返畀我老婆，同佢講話佢已經通知咗細佬學校嘅老師，個老師仲已經同副校講咗，所以應該學校會搵到個學生嘅家長同埋處理後續嘅事宜，叫我哋唔使擔心。而細佬嘅情緒亦都慢慢開始平復。但係到咗嗰晚嘅大概十點幾嘅時候，突然間有個警察打畀細佬，細佬開頭唔知點就畀咗個電話我老婆聽，原來細佬間學校嘅校長最後係報咗警，因為件事係由細佬發現所以警察就要問返細佬啲聯絡電話同地址作紀錄。警察仲同我老婆講話個細路仔已經搵到，但係因為佢提過自殺，咁所以而家入咗醫院接受緊醫生嘅檢查。咁細佬知道之後就更加放心，因為可以肯定個男同學冇事而佢嘅家長都陪住佢。

講番個男仔嘅做法當然好唔應該，我哋唔知道佢真係想自殺定係為咗引起其他人嘅注意，想多啲人關心佢。但係佢嘅做法就一定係錯嘅，而且令到好多人都擔心。另一方面其實我哋亦都要知道呢個年紀嘅細路仔其實佢哋好容易會諗埋一面，如果家長唔多啲同佢哋傾計，唔理解佢哋嘅諗法，都仲係諗住用高壓嘅方式去強迫佢哋按大人嘅指示去做，而唔去聆聽同埋理解佢哋嘅感受嘅話，最終都只會令到仔女同父母嘅距離越嚟越遠。今次呢件事亦都再次令到我想問嘅一個問題就係，其實處理中學生拍拖係咪真係咁簡單交畀學校處理就可以解決曬所有問題呢！我相信嗰個向學校投訴嘅家長根本就冇諗過事情會發展到咁樣，無非都只不過係想用最快嘅方法解決咗佢個女同男仔拍拖嘅問題！但係問題係咪真係已經解決咗呢？